ငြိမ်းချမ်းရေး စစ်တမ်း (၁၉) – မငြိမ်းချမ်းနိုင်တဲ့ ငြိမ်းချမ်းရေးညီလာခံ (အပိုင်း – ၅)

U Aung Htoo

.
ပထမတခုမှာ နောက်ခံ ဥပဒေအဆောက်အအုံ (Background Legal Framework) ဖြစ်သည်။ အမျိုးသား
ညီလာခံကျင်းပနေစဉ်က စစ်အာဏာရှင်စနစ်ကို အသက်သွင်းထားသည့် ဖွဲ့ စည်းပုံတည်ရှိမနေ။ ယခု ၂၀၀၈ ဖွဲ့ စည်းပုံ
တည်ရှိနေပြီဖြစ်သည်။ ယင်းသည် ငြိမ်းချမ်းရေးညီလာခံကို အရိပ်မဲကြီးထိုးနေမည်မှာ မြေကြီးလက်ခတ်မလွဲပါ။

.
ဒုတိယတခုမှာ ညီလာခံကိုယ်စားလှယ်အချိုးအစား(Proportion of Representation) ဖြစ်သည်။အမျိုးသား
ညီလာခံတုံးကပင် ကိုယ်စားလှယ်အစုအဖွဲ့ အနေဖြင့် အမည်နာမ အတိအကျတပ်ကာ တက်ရောက်ခွင့်မရခဲ့သော တပ်မတော်သားများအား ငြိမ်းချမ်းရေးညီလာခံတွင်ကိုယ်စားလှယ်ဦးရေ ၁၅၀ အထိသတ်မှတ်ပေးလိုက်သည်။ ၄င်းတို့ 
သည် ၂၀၀၈ ဖွဲ့ စည်းပုံကို ဆက်လက်သက်ဆိုးရှည်စေမည့် အခိုင်အမာမဲ (Solid Voting) ဖြစ်သည်။

.
ဆက်လက်ရေတွက်ပါမည်။ လွှတ်တော်ကိုယ်စားလှယ် ၇၅ ဦးအနက် ကြံ့ဖွံ့ မှ ၁၀ ဦးခန့် ပါလာနိုင်သည်။ အစိုးရအဖွဲ့ ကိုယ်စားလှယ် ၇၅ ဦးအနက် အနည်းဆုံးအားဖြင့် ၂၀ ဦးခန့် ကို လက်ရှိစစ်ဗိုလ်များ၊ စစ်ဗိုလ်ဟောင်းများ
ထဲက ထည့်သွင်းပေးရနိုင်ဘွယ်ရှိသည်။ တိုင်းရင်းသား လက်နက်ကိုင်အဖွဲ့ အစည်းကိုယ်စားလှယ် ၁၅၀ အနက် အနည်းဆုံး ၅၀ ဦးခန့် မှာ စစ်ခေါင်းဆောင် ဟောင်း သစ်များနှင့်ပုလင်းတူဗူးဆို့ ဖြစ်နေပြီဟု တွက်နိုင်သည်။ တရားဝင်
နိုင်ငံရေးပါတီ ကိုယ်စားလှယ် ၁၅၀ အနက် ၁၀၀ ဦး ခန့် သည် ၂၀၀၈ ဖွဲ့ စည်းပုံကိုတဖြေးဖြေးပြင်ဆင်သွားရေးကိုသာ သဘောတူနိုင်ဘွယ်ရှိသည်။ တိုင်းရင်းသားကိုယ်စားလှယ် ၅၀ နှင့် အခြားပါဝင်သင့်ပါဝင်ထိုက်သူ ၅၀ တို့ အနက်
(အမျိုးသားညီလာခံမှာကဲ့သို့ ပင်) အနည်းဆုံး ၇၀ ခန့် မှာ စစ်အစိုးရက စိတ်ကြိုက်ခေါ်ယူမည့်သူများ ဖြစ်မှာ သေချာ
လောက်သည်။ စုစုပေါင်းလျှင် ၄၀၀ ရှိသည်။

.
ငြိမ်းချမ်းရေးညီလာခံကိုယ်စားလှယ် ၇၀၀ အနက် အနည်းဆုံး ၄၀၀ မှာ ၂၀၀၈ ဖွဲ့ စည်းပုံအတိုင်းသာ ဆက်
သွားလိုသူများ၊ သို့ မဟုတ် ၂၀၀၈ ဖွဲ့ စည်းပုံကို ပုဒ်မ ၄၃၆ အခြေခံဖြင့် တဖြေးဖြေးပြင်ဆင်သွားလိုသူများ၊ သို့ မဟုတ်
၂၀၀၈ ဖွဲ့ စည်းပုံကို အခြေခံ၍သာ ဖက်ဒရယ်ပြည်ထောင်စုဟူသော အမည်နာမဖြင့်ဖေါ်ဆောင်လိုသူများ ဖြစ်မည်မှာ မလွဲဧကန်ပင်။ ကိုယ်စားလှယ်ဦးရေအချိုးအစားအရ ကြည့်ရုံမျှနှင့် ညီလာခံ၏ ရလဒ်ကို တွက်ဆနိုင်သည်။
ဒီမိုကရက်တစ် ဖက်ဒရယ်ပြည်ထောင်စု ဖွဲ့ စည်းပုံအခြေခံဥပဒေအသစ်တရပ်ပေါ်ထွက်လာရေးမှာ ဤကိုယ်စားလှယ်
အချိုးအစားမျိုးဖြင့် လုံးဝပင် မဖြစ်နိုင်ပါ။

.
တတိယတခုမှာ ညီလာခံကို လည်ပတ်စေမည့် နောက်ခံစုဖွဲ့ မှု (Operational institutional mechanism) ဖြစ်သည်။ ယင်းတွင် စစ်ခေါင်းဆောင်ဟောင်းများ၊ ၄င်းတို့ နှင့် အပေးအယူတည့်လျှက်ရှိသော တိုင်းရင်းသားခေါင်း
ဆောင်များ၊ စစ်ခေါင်းဆောင်ဟောင်းသစ်များ၏ မျက်နှာကိုကြည့်ပြီး ဘ၀ရပ်တည်နေကြရသည့်  မြန်မာငြိမ်းချမ်းရေး
ဌာန (MPC) မှ ပုဂ္ဂိုလ်များတို့ က ညီလာခံအတွက် ဟိုကော်မတီ၊ သည်ကော်မတီ စသည့် ခေါင်းစဉ်ခွဲ အမျိုးမျိုး
အောက်တွင် အတွင်းရေးမှုးအဖွဲ့ သဘွယ်ဆောင်ရွက်ခွင့်ရနေခြင်း ဖြစ်သည်။

.
စတုတ္ထနှင့် အရေးကြီးလှသော ဘောင်ခတ်မှုမှာ နိုင်ငံရေးဆွေးနွေးမှု ဆိုင်ရာမူဘောင်၏ အခန်း (၆) အပုဒ် (၆-၂) အရ အောက်ပါအတိုင်း ကန့် သတ်ထားခြင်းဖြစ်သည်။

.
” ပြည်ထောင်စု ငြိမ်းချမ်းရေးညီလာခံတွင် လုပ်ငန်းကော်မတီ အသီးသီးမှ တင်ပြလာသော ကိစ္စရပ်များအနက်
ဖက်ဒရယ်စနစ်ကို အခြေခံသည့် ပြည်ထောင်စု ဆိုင်ရာကိစ္စရပ်များ၊ နိုင်ငံတော်လုံခြုံရေးဆိုင်ရာ ကိစ္စရပ်များနှင့် လုံခြုံရေးဆိုင်ရာ ပြန်လည်ပေါင်းစည်းရေး ကိစ္စရပ်များအပါအ၀င် အရေးကြီးသောကိစ္စရပ်များကို ညီလာခံတက်ရောက်သူ အစုအဖွဲ့ တခုချင်းစီမှ အနည်းဆုံး ၇၅ ရာခိုင်နုန်း အထက် ထောက်ခံမဲရရှိ၍ တက်ရောက်သူ စုစုပေါင်း၏ အနည်းဆုံး ၇၅ ရာခိုင်နုန်းအထက်
ထောက်ခံမဲဖြင့် ဆုံးဖြတ်နိုင်သည်။”

.
“ဆိုးလှချည်လား” ဟု ရေရွှတ်မိသည်။ ငယ်ငယ်က သူငယ်ချင်းအချင်းချင်းနောက်ပြောင်ပြောဆိုခဲ့သည့်
“သည်ထက် ဆိုးတာတောင် သည်လောက်မဆိုးဘူး” ဟူသောစကားကို သတိရမိသည်။ ဆိုးလှပြီဟု သုံးသပ်ခဲ့
သော အမျိုးသားညီလာခံ လုပ်ထုံးလုပ်နည်းများမှာပင် ယင်းကဲ့သို့ ကန့် သတ်မှုမျိုး မပါရှိပါ။ ဖက်ဒရယ်ပြည်ထောင်
စု တည်ဆောက်ရေး၊ ဖက်ဒရယ်တပ်မတော်ဖွဲ့ စည်းရေး စသည်တို့ နှင့် စပ်လျှဉ်း၍ “ညီလာခံတက်ရောက်သူ အစု
အဖွဲ့ တခုချင်းစီတိုင်းမှ အနည်းဆုံး၇၅ ရာခိုင်နုန်း အထက်ထောက်ခံမဲ” ရရန်ဆိုသည်မှာမည်သို့ မျှမဖြစ်နိုင်။ ပထမ
အဆင့်မှာ ကထဲက ပယ်ချခံခဲ့ရပြီးဖြစ်မည်။ ဒုတိယအဆင့်ဖြစ်သည့် “တက်ရောက်သူ စုစုပေါင်း၏ အနည်းဆုံး ၇၅ ရာခိုင်နုန်းအထက်ထောက်ခံမဲ” ရရန်ဟူသည်မှာ လုံးဝပင် မဖြစ်နိုင်တော့။ ပြင်ရန်လွန်စွာ ခက်အောင်လုပ်ထားသည့် ၂၀၀၈ ဖွဲ့ စည်းပုံ၏ ပုဒ်မ ၄၃၆ ကန့် သတ်မှုမျိုးကို ပြည်ထောင်စုညီလာခံတွင် အသုံးချထားခြင်းပင်။

.
ဤမျှဆိုးဝါးလှသော နိုင်ငံရေးဆွေးနွေးမှုဆိုင်ရာမူဘောင်ကို အတည်ပြုပေးခဲ့ကြသော နိုင်ငံရေးအင်အားစု
များအားလုံးတွင် တာဝန်ရှိပါမည်။ ယင်းအပေါ်အခြေခံ၍ ငြိမ်းချမ်းရေးညီလာခံကျင်းပပါတော့မည်။ ညီလာခံ အမြန်
ဆုံးပြီးစီးမည်ဆိုပါက ၂၀၀၈ ဖွဲ့ စည်းပုံကို ပိုမိုကျားကန် ပေးမည့်ဆုံးဖြတ်ချက်များနှင့် လွှတ်တော်နှင့် အစိုးရ၏ အခွင့်
အာဏာအပေါ် သံမဏိကြိုးဖြင့် တုတ်နှောင်ထားမည့် ကန့် သတ်ချက်များသာ ထွက်ပေါ်လာပါမည်။ ညီလာခံကို နှစ်ပေါင်းရှည်ကြာစွာကျင်းပနေမည်ဆိုပါလျှင်လည်း တဖက်တွင် ၂၀၀၈ ဖွဲ့ စည်းပုံနှင့်အညီ ရွေးကောက်ပွဲများ တခုပြီးတခုကျင်းပကာ သက်တမ်းကို ဆွဲဆန့် သွားပါတော့မည်။ အခြေအနေနှစ်ရပ်လုံးတွင် စစ်အာဏာရှင်စနစ်သာ
ရေရှည်တည်တန့် ခိုင်မြဲဘွယ်ရှိပါမည်။ “ဆုပ်လည်းစူး၊ စားလည်းရူး” ဆိုသည်မှာ ဤ အခြေအနေမျိုးဖြစ်သည်။

.
သို့ ဖြစ်၍ဒီမိုကရက်တစ်ဖက်ဒရယ်ပြည်ထောင်စုနိုင်ငံပေါ်ထွန်းလာရေးကို လိုလားမြတ်နိုးသော နိုင်ငံရေး အင်အားစုများအားလုံးသည် ဤနိုင်ငံရေးဆွေးနွေးပွဲဆိုင်ရာ မူဘောင်နှင့် ငြိမ်းချမ်းရေးညီလာခံဟူသည်ကို ပြတ်သား
စွာ ဆန့် ကျင်ရပ်တည်ကြရန်သာရှိသည်။ ထိုမှနောက်တဆင့်သည် အဘယ်နည်း။ အမျိုသားဒီမိုကရေစီ အဖွဲ့ ချုပ်
အစိုးရသည် တခြမ်းပဲ့ NCA ကို လက်မှတ်မထိုးသေးသော အဖွဲ့ အစည်းများကိုပါ ဖိတ်ခေါ်ပြီး ဘက်နှစ်ဘက် ဆွေးနွေးပွဲများပြန်လည်ကျင်းပရန်လိုပါမည်။ နောက်တဆင့်တွင်(တနိုင်ငံလုံးအပစ်၇ပ်သဘောတူညီချက်များအပြင်) ဒီမိုကရက်တစ်ဖက်ဒရယ်ပြည်ထောင်စု အုတ်မြစ်ချနိုင်ရန် ရှင်းလင်းတိကျသော အခြေခံကျောရိုးများ၊ သုံးပွင့်ဆိုင်
အပေါ်အခြေခံ၍ အများဆုံး ကိုယ်စားလည် ၃၀၀ ထက်မပိုဘဲ တက်ရောက်သော နိုင်ငံရေးဆွေးနွေးပွဲ ကျင်းပနိုင်ရေး
သဘောတူညီချက်များ အစရှိသည်တို့ ပါဝင်စေမည့် ငြိမ်းချမ်းရေးစာချုပ် Peace Agreement ထွက်ပေါ်လာအောင်
လုပ်၊ ထိုစာချုပ်ကိုသာ လွှတ်တော်သို့ တင်သွင်းကာ ဥပဒေပြုခြင်း ဖြင့် ဥပဒေပြသနာကို ကျော်လွှားနိုင်ပါမည်။

.
ပြည်ထောင်စုအတွက် ဤမျှအရေးကြီးလှသော အချိန်တွင် တိုင်းရင်းသားပေါင်းစုံပြည်သူ အသီးသီးသည်
လည်း မိမိတို့ ၏ သဘောထားအမြင်များအား တဦးချင်းစီအနေဖြင့် ဖြစ်စေ၊ အဖွဲ့ အစည်းအလိုက်ဖြစ်စေ ထုတ်ဖော်
ကြခြင်းဖြင့် နိုင်ငံရေးဆွေးနွေးပွဲအား လူထုဆွေးနွေးပွဲအနေအထားမျိုးရောက်အောင် ဖန်တည်းနိုင်မှသာ စစ်မှန်သည့်
ငြိမ်းချမ်းရေးရနိုင်သော လမ်းကြောင်းပေါ်လာပါမည်။ မငြိမ်းချမ်းနိုင်သော ငြိမ်းချမ်းရေးညီလာခံကို စောင့်ရန်မလိုပါ။

.
အောင်ထူး
(လူ့ အခွင့်အရေးရှေ့ နေ၊ ဥပဒေအထောက်အကူပြုကွန်ရက်တည်ထောင်သူ)
Website: legalaidnetwork.org
Email:legalaidnetwork@gmail.com
ဇန်န၀ါရီလ (၉) ရက် ၂၀၁၆ ခုနှစ်

Leave a Reply

Your email address will not be published.