မော်ရစ်ရှပ် သမ္မတအဖြစ် မွတ်စလင်အမျိုးသမီး သိပ္ပံပညာရှင် အမီနာအား ရွေးကောက်တင်မြှောက်

Ameenah-Gurib-Fakim-Mauritius-01

 

 

အထင်ကရ မွတ်စလင်အမျိုးသမီး သိပ္ပံပညာရှင် တစ်ဦးဖြစ်သူ အမီနာ ဂူရိဘ်-ဖာကင် (Ameenah Gurib-Fakim) အား မော်ရစ်ရှပ်နိုင်ငံ (Mauritius) ၏ သမ္မတအဖြစ် ရွေးကောက်တင်မြှောက်လိုက်ကြောင်း သိရှိရသည်။

 

အိန္ဒိယသမုဒ္ဒရာ (Indian Ocean) အတွင်း၌ရှိသော မော်ရစ်ရှပ်နိုင်ငံ၏ ပါလီမန်က အမီနာအား သမ္မတအဖြစ် ရွေးကောက်တင်မြှောက်မှုကို ကြာသပတေးနေ့က အတည်ပြုလိုက်ပြီဖြစ်ပြီး အမီနာသည် မော်ရစ်ရှပ်နိုင်ငံ၏ ပထမဦးဆုံးသော အမျိုးသမီး သမ္မတအဖြစ် သမိုင်းမှတ်တမ်း ၀င်သွားပြီ ဖြစ်သည်။ သူမအား သမ္မတအဖြစ် ရွေးကောက်တင်မြှောက်မှုကို အတိုက်အခံပါတီကပါ ထောက်ခံမဲ ထည့်ခဲ့ကြောင်း သိရသည်။

 

မော်ရစ်ရှပ်နိုင်ငံသည် ဗြိတိသျှနိုင်ငံ (British) မှ (၁၉၆၈) ခုနှစ်တွင် လွတ်လပ်ရေးရရှိခဲ့ပြီး ဓနသဟာယအဖွဲ့ဝင် နိုင်ငံအဖြစ် ဆက်လက်တည်ရှိနေခဲ့ရာ (၁၉၉၂) ခုနှစ်အထိ ဗြိတိသျှဘုရင်မ Queen Elizabeth II က နိုင်ငံဦးသျှောင်အဖြစ် တာဝန်ယူထားခဲ့သည်။ ထိုအစီအစဉ်အား (၁၉၉၂) ခုနှစ်တွင် ရပ်တန့်ခဲ့ပြီး နိုင်ငံဦးသျှောင်နေရာတွင် သမ္မတရာထူးဖြင့် အစားထိုးခဲ့ခြင်းဖြစ်သည်။

 

မော်ရစ်ရှပ်နိုင်ငံသည် အိန္ဒိယသမုဒ္ဒရာအတွင်း တည်ရှိနေသော်လည်း အာဖရိကတိုက် (Africa) အနီးတွင် တည်ရှိနေသဖြင့် အာဖရိကနိုင်ငံတစ်ခုအဖြစ် သတ်မှတ်ထားသည်။

 

လူဦးရေအားဖြင့် (၁.၃) သန်းခန့်ရှိပြီး အာဖရိက၏ အချမ်းသာဆုံးနှင့် အကျင့်ပျက်ခြစားမှု အနည်းဆုံး နိုင်ငံတစ်ခုအဖြစ် သတ်မှတ်ထားခြင်း ခံရသည်။

 

အမီနာ ဂူရိဘ်-ဖာကင်သည် မော်ရစ်ရှပ်နိုင်ငံတွင် အခြေစိုက်သော Centre for Phytotherapy Research (CEPHYR) ၏ ဒါရိုက်တာအဖြစ် လုပ်ကိုင်ဆောင်ရွက်လျက်ရှိပြီး ၎င်းသုတေသနဌာနမှာ အလှကုန်များ၊ အစားအစာ အဟာရနှင့် ဆေးဝါးကုထုံးများ၌ သဘာဝအပင်များ အသုံးချမှုအား စူးစမ်းဆောင်ရွက်နေသော ဌာနဖြစ်သည်။

 

ဗြိတိသျှနိုင်ငံ၏ Exeter နှင့် Surrey တက္ကသိုလ်များမှ ဘွဲ့ထူးဂုဏ်ထူးများ ရရှိထားပြီး မော်ရစ်ရှပ်တက္ကသိုလ် (Mauritius University) အော်ဂင်းနစ်-ဓာတုဗေဒဌာန၏  ဌာနမှူးလည်းဖြစ်သည်။ ၎င်းအပြင် ကမ္ဘာ့ဘဏ် (World Bank) နှင့် အခြားသော နိုင်ငံတကာ အဖွဲ့အစည်းများ၌လည်း တာဝန်ထမ်းဆောင်ခဲ့ဖူးသူဖြစ်သည်။

 

 

ကိုးကား – AFP

 

Leave a Reply

Your email address will not be published.